Ma Long og Ding Ning Ólympíumeistarar í einliðaleik

Heimsmeistararnir Ma Long og Ding Ning frá Kína sigruðu í einliðaleik á Ólymíuleikunum í Rio de Janeiro. Ma vann öruggan 4-0 sigur á landa sínum Zhang Jike. Ding Ning þurfti að hafa meira fyrir sigrinum en hún lagði Li Xiaoxia frá Kína í oddalotu, og hefndi þar með fyrir tapið í úrslitaleiknum á Ólympíuleikunum í London.

Jun Mizutani frá Japan fékk bronsið í karlaflokki eftir sigur á hinum fertuga Vladimir Samsonov frá Hvíta-Rússlandi. Í kvennaflokki kom Kim Song I frá Norður-Kóreu á óvart og sigraði Ai Fukuhara frá Japan í leik um bronsið. Kim var raðað nr. 27. en Fukuhara nr. 6.

Nánari fréttir og úrslit má sjá á heimasíðu leikanna.

ÁMU