Íslensku liðin úr leik á Smáþjóðaleikunum

Liðakeppni í borðtennis Smáþjóðaleikanna í Andorra fór fram í dag. Ísland varð í neðsta sæti í sínum riðlum og liðin hafa því lokið keppni á leikunum þetta árið.

Kvennaliðið var í riðli með Luxemborg, San Marínó og Mónakó. Gegn Mónakó vannst ein lota í tvíliðaleik en báðir einliðaleikir töpuðust 0-3. Leikurinn gegn San Marino fór sömuleiðis 0-3 en þar vann Aldís eina lotu í sínum einliðaleik. Leikurinn gegn Luxemborg tapaðist 0-3 og engin lota vannst.

Karlaliðið lék í riðli með Montenegro (Svartfjallalandi), Möltu og Kýpur. Ingi Darvis og Magnús Gauti unnu tvíliðaleik á móti Kýpur og Ingi var nálægt því að vinna einliðaleik sem fór í oddalotu en leikurinn endaði 1-3 fyrir Kýpur. Í leiknum á móti Möltu sem fór 0-3 unnust nokkrar lotur en Magnús Gauti vann tvær lotur og Ingi Darvis eina í sínum leikjum. Í leiknum á móti Montenegro vannst engin lota og úrslitin 0-3.

Myndin er af íslenska landsliðshópnum ásamt Peter Nilsson landsliðsþjálfara.