Alexander vann eina leik dagsins í einstaklingskeppni
Keppni í einstaklingsgreinum á EM unglinga hófst 16. júlí. Allir íslensku keppendurnir kepptu í einliðaleik sem og íslensku pörin þrjú í tvenndarleik. Alexander Ivanov vann eina leikinn sem íslensku keppendurnir unnu í dag, en Guðbjörg Vala Gunnarsdóttir, Kristján Ágúst Ármann og Sól Kristínardóttir Mixa töpuðu leik í oddalotu.
Leikið er í 3-4 manna riðlum í einliðaleik en með einföldum útslætti í tvíliðaleik og tvenndarleik.
Liðakeppninni lauk 15. júlí. Til stóð að Ísland og Malta kepptu um 38. sæti í sveinaflokki síðdegis í gær en af því varð ekki og liðin ljúka því keppni í 38.-39. sæti af 39 liðum.
Tilkynnt hafði verið fyrir mótið að ekki yrði leikið um sæti 25-33 í meyjaflokki. Íslenska liðið varð í 3. sæti í O-riðli og má því segja að liðið hafi lokið keppni í 29.-30. sæti ásamt liði Bosníu-Hergegóvínu, sem varð í 3. sæti í P-riðli.
Úrslit úr leikjum í einstaklingskeppni 16. júlí:
Einliðaleikur sveina 15 ára og yngri
Heiðar Leó Sölvason keppir í riðli 22. Hann tapaði 0-3 fyrir leikmanni frá Austurríki og 0-3 fyrir skoskum strák. Heiðar á eftir leik við keppanda frá Lúxemborg.
Kristján Ágúst Ármann leikur í riðli 24. Hann tapaði 0-3 fyrir dreng frá Sviss og 2-3 fyrir leikmanni frá Moldóvu. Hann keppir við Letta þann 17. júlí.
Lúkas André Ólason er í riðli 23 og tapaði hann 0-3 fyrir leikmanni frá Hollandi og 1-3 fyrir eistneskum leikmanni. Þann 17. júlí mætir hann frönskum leikmanni.
Einliðaleikur meyja 15 ára og yngri
Guðbjörg Vala Gunnarsdóttir er í riðli 22. Hún tapaði 0-3 fyrir stúlku frá Úkraínu og 2-3 (9-11 í oddalotu) fyrir annarri frá Lúxemborg. Hún leikur við keppanda frá Búlgaríu 17. júlí.
Helena Árnadóttir dróst í riðil 17. Hún tapaði fyrst 0-3 fyrir stúlku frá Þýskalandi og 0-3 fyrir keppanda frá Englandi. Hún leikur við leikmann frá Póllandi 17. júlí.
Einliðaleikur drengja 16-18 ára
Alexander Ivanov keppir í riðli 40. Hann tapaði 0-3 fyrir leikmanni frá Bosníu-Herzegóvínu en vann Neil Incorvaja frá Möltu 3-2, 11-9 í oddalotu, og var eini íslenski leikmaðurinn sem vann leik í dag. Í lokaleiknum í riðlinum mætir hann tékkneskum leikmanni.
Benedikt Aron Jóhannsson leikur í riðli 3. Hann tapaði 0-3 fyrir dreng frá Litháen. Hann er í þriggja manna riðli og keppir við leikmann frá Serbíu 17. júlí í seinni leiknum.
Darian Adam Róbertsson Kinghorn er í riðli 36 og tapaði hann 0-3 fyrir leikmanni frá Danmörku og 0-3 fyrir keppanda frá Sviss. Í lokaleiknum, þann 17. júlí, mætir hann sænskum leikmanni.
Einliðaleikur stúlkna 16-18 ára
Sól Kristínardóttir Mixa leikur í riðli 28 og hóf keppni á EM með 1-3 tapi gegn stúlku frá Ítalíu. Hún tapaði svo 2-3 fyrir leikmanni frá Georgíu. Þann 17. júlí mætir hún stúlku frá Moldóvu.
Tvenndarleikur kadetta 15 ára og yngri
Lúkas og Helena töpuðu 1-3 fyri pari frá Tyrklandi en Kristján Ágúst og Guðbjörg Vala töpuðu 0-3 fyrir pari frá Tékklandi. Báðir leikir voru í 128 para útsláttarkeppni.
Tvenndarleikur júníora 16-18 ára
Benedikt og Sól töpuðu 1-3 fyrir ensku pari í 128 para útsláttarkeppni.
Auk þess að keppni í riðlum í einliðaleik ljúki, hefst keppni í tvíliðaleik þann 17. júlí.
Guðbjörg Vala og Helena dróust gegn pari frá Búlgaríu í 64 para úrslitum í tvíliðaleik meyja.
Kristján og Lúkas keppa við blandað par frá Írlandi og Úkraínu í 64 para úrslitum í tvíliðaleik sveina. Heiðar keppir með Sebastian Asu frá Eistlandi og þeir dróust gegn þýsku pari.
Alexander og Benedikt mæta blönduðu pari frá Póllandi og Spáni í 64 para úrslitum í drengjaflokki. Darian keppir með keppanda frá Kýpur og mæta þeir pari frá Portúgal.
Sól keppir með Valeriju Kosenko frá Lettlandi í tvíliðaleik stúlkna og þær mæta blönduðu pari frá Póllandi og Þýskalandi í 64 para úrslitum.
Hér má fylgjast með keppni og sjá úrslit úr einstökum leikjum: https://www.ettu.org/european-youth-championships/
Forsíðumynd af Alexander tekin af myndavef ETTU.
