Guðbjörg Vala komst upp úr riðlinum í einliðaleik meyja
Guðbjörg Vala Gunnarsdóttir sigraði stúlku frá Búlgaríu í einliðaleik á EM unglinga í Ostrava og komst upp úr riðlinum í útsláttarkeppnina í einliðaleik. Að lokinni keppni í riðli 22 voru þrjár stúlkur jafnar í 2.-4. sæti, hver um sig með einn vinning, en Guðbjörg Vala hafði hagstæðasta hlutfall unninna og tapaðra lotna.
Ritstjóri man ekki til þess að áður hafi íslensk stúlka komist áfram í útsláttarkeppni í einliðaleik á EM unglinga.
Guðbjörg Vala mætir Leonor Gomes frá Portúgal kl. 9.40 þann 18. júlí í 64 manna úrslitum.
Auk þess vantaði Guðbjörgu Völu og Helenu Árnadóttur eitt stig til að komast áfram í tvíliðaleik meyja, en töpuðu leiknum að lokum 17-19 í oddalotu.
Kristján Ágúst Ármann var líka nálægt sigri í einliðaleik sveina þegar hann tapaði í oddalotu gegn lettneskum strák í lokaleiknum í riðlinum.
Úrslit úr leikjum í einstaklingskeppni 17. júlí:
Einliðaleikur meyja 15 ára og yngri
Guðbjörg Vala Gunnarsdóttir sigraði keppanda frá Búlgaríu 3-1 og komst áfram í útsláttarkeppnina í einliðaleik meyja, eins og sagt er frá hér að ofan. Búlgarska stúlkan hafði sigrað stúlkuna frá Lúxemborg, sem Guðbjörg Vala tapaði fyrir í oddalotu þann 16. júlí.
Helena Árnadóttir tapaði 1-3 fyrir stúlku frá Póllandi.
Einliðaleikur sveina 15 ára og yngri
Heiðar Leó Sölvason tapaði 0-3 fyrir leikmanni frá Lúxemborg í lokaleiknum í riðlinum.
Kristján Ágúst Ármann tapaði 8-11 í oddalotu fyrir keppanda frá Lettlandi.
Lúkas André Ólason tapaði 0-3 fyrir frönskum leikmanni.
Einliðaleikur drengja 16-18 ára
Alexander Ivanov beið lægri hlut fyrir tékkneskum leikmanni og lauk leiknum 0-3.
Benedikt Aron Jóhannsson tapaði 1-3 fyrir dreng frá Serbíu í seinni leik sínum í riðlinum.
Darian Adam Róbertsson Kinghorn tapaði 1-3 fyrir sænskum leikmanni.
Einliðaleikur stúlkna 16-18 ára
Sól Kristínardóttir Mixa tapaði 0-3 fyrir leikmanni frá Moldóvu í lokaleik riðilsins.
Tvíliðaleikur meyja 15 ára og yngri
Guðbjörg Vala og Helena töpuðu 17-19 í oddalotu fyrir pari frá Búlgaríu í 64 para úrslitum. Þær voru undir 7-10 í oddalotunni en tókst að jafna og komast yfir og áttu nokkra leikbolta áður en þær töpuðu oddalotunni.
Tvíliðaleikur sveina 15 ára og yngri
Kristján og Lúkas lutu í lægra haldi fyrir blönduðu pari frá Írlandi og Úkraínu í 64 para úrslitum og lauk leiknum 0-3.
Heiðar Leó keppti með Sebastian Asu frá Eistlandi og töpuðu þeir 0-3 gegn þýsku pari.
Tvíliðaleikur stúlkna 16-18 ára
Sól keppti með Valeriju Kosenko frá Lettlandi og töpuðu þær 0-3 gegn blönduðu pari frá Póllandi og Þýskalandi.
Tvíliðaleikur drengja 16-18 ára
Alexander og Benedikt mættu blönduðu pari frá Póllandi og Spáni í 64 para úrslitum og lutu í lægra haldi 0-3.
Darian keppti með keppanda frá Kýpur og töpuðu þeir 0-3 gegn pari frá Portúgal.
Allir íslensku keppendurnir, að undanskilinni Guðbjörg Völu, hafa lokið keppni á mótinu.
Hér má fylgjast með keppni og sjá úrslit úr einstökum leikjum: https://www.ettu.org/european-youth-championships/
Forsíðumynd af Guðbjörgu og Helenu tekin af myndavef ETTU.
