Úrslitakeppnin í 4. deild verður á Akureyri 18. apríl
Leikið verður til úrslita í 4. deild í Glerárskóla á Akureyri laugardaginn 18. apríl. Þá mætast tvö efstu liðin í suðurriðli deildarinnar, KR-F og HK-D og efsta liðið í norðurriðlinum, Akur-A. Sigurliðið leikur í 3. deild á næsta keppnistímabili.
Fyrsti leikurinn verður kl. 11, annar leikurinn kl. 14 og síðasti leikurinn kl. 16.30.
Í úrslitakeppninni í deildakeppninni verður leikið eftir nýju fyrirkomulagi, þar sem vinna þarf fjóra leiki í stað sex til að vinna viðureignina, sbr. frétt frá 23.1.2026:
„Sjö leikja fyrirkomulag í úrslitakeppni og umspili í deildarkeppni
Aftast í 12. gr. reglugerðar um flokkakeppni sem fjallar um úrslitakeppnina bætist við eftirfarandi texti, en fyrirkomulagið hefur verið rætt nokkuð milli mótanefndar og ýmissa forsvarsmanna félaga. Uppstilling fyrirkomulagsins er í samræmi við útfærslu í handbók ITTF.
Úrslitakeppnin og umspilsleikir sömuleiðis, skulu leiknir með eftirfarandi fyrirkomulagi:
Sjö leikja kerfi
1) A v X
2) B v Y
3) C v Z
4) Tvíliðaleikur
5) A v Y
6) C v X
7) B v Z
Í fyrirkomulaginu eru leiknir allt að 7 leikir í viðureign, fyrst 3 einliðaleikir, svo tvíliðaleikur og að lokum 3 einliðaleikir. Þrír til fimm leikmenn leika hverja viðureign. Þrír sömu leikmenn spila alla einliðaleikina en frjálst er að velja hvern sem er úr fimm manna liði í tvíliðaleikinn. Liðið sem fyrr sigrar 4 leiki vinnur viðureignina. Engar breytingar eru leyfðar á niðurröðun eftir að viðureignin er hafin.“
Uppfært með tímasetningum 26.3.
