Opnað fyrir breytingar á liðum í flokkakeppni

Í dag hefur verið opnað fyrir möguleikann á viðbótum og tilfærslum milli liða í Raflandsdeildunum og 2. deild karla í samræmi við 3. mgr. 7. gr. reglugerðar BTÍ um flokkakeppni. Þar segir:

„Aðeins á tímabilinu 15. desember til 4. janúar er leikmanni heimilt að skipt um lið í liðakeppni 1. og 2. deildar. Mótanefnd BTÍ skal tilkynnt um liðaskipti á framangreindu tímabili og er sú tilkynning óafturkallanleg.“

Tilkynningar skulu sendar til formanns mótanefndar á netfangið [email protected].

Stjórn BTÍ ákvað á næstsíðasta stjórnarfundi sínum þann 19. nóvember 2017 að gera eina hóflega takmörkun á framangreindu ákvæði. Breytingunni verður bætt við í reglugerðina fljótlega þegar kostur gefst og hún felur í sér að ekki mega fleiri færast úr ákveðnu liði og yfir í annað eða önnur lið, en helmingur þeirra leikmanna sem leikið hefur fyrir liðið á haustönn.

Dæmi um þetta væri lið þar sem fimm leikmenn eru skráðir til leiks og fjórir hafa leikið á haustönn. Þá mega í mesta lagi tveir leikmannanna færa sig úr liðinu og í önnur lið. Ef allir leikmennirnir fimm hefðu spilað þá væri fjöldinn enn tveir leikmenn sem mega færa sig úr liðinu, þar sem þrír væri meira en helmingur.