Víkingur og KR-B, BH-A og Víkingur-A í úrslitum Raflandsdeildanna
Seinni undanúrslitaleikirnir í Raflandsdeildinni fóru fram í Íþróttahúsi Snælandsskóla sunnudaginn 7. apríl. Þá réðst það hvaða lið mætast í úrslitum í Raflandsdeildinni laugardaginn 13. apríl. Úrslitin fara fram í Íþróttahúsinu við Strandgötu í Hafnarfirði og hefst kvennaleikurinn kl. 12 og karlaleikurinn kl. 14. Eingöngu verður leikinn einn úrslitaleikur skv. breyttri reglugerð.
Í Raflandsdeild kvenna sló B-lið KR út A-lið KR, sem er ríkjandi Íslandsmeistari. Eftir að B-liðið vann 3-1 í fyrri undanúrslitunum dugði þeim að vinna tvo leiki í seinni leiknum til að komast í úrslitin. Það tókst og leiknum var hætt í stöðunni 2-2, enda ljóst að B-liðið hefði haft betur í viðureigninni.
Í hinum undanúrslitunum í kvennadeildinni sigruðu Víkingskonur BH samanlagt 4-0.
Í Raflandsdeild karla vann A-lið Víkings A-lið KR samtals 5-1. HK-A gaf seinni leik sinn við BH-A en BH-A vann fyrri leikinn 3-0.
Það verða því Víkingur og KR-B, sem leika til úrslita í Raflandsdeild kvenna og BH-A og Víkingur-A sem mætast í Raflandsdeild karla.
Úrslitin úr einstökum leikjum helgarinnar verða fljótlega aðgengileg á vef Tournament Software.
Forsíðumynd frá Auði Tinnu Aðalbjarnardóttur.
ÁMU
