Drengjalið Íslands sigraði Möltu á EM unglinga
Keppni á EM unglinga í Ostrava í Tékklandi hófst 7. júlí og hófst með keppni í riðlum í liðakeppni.
Drengjaliðið, skipað Ellert Kristjáni Georgssyni, Gesti Gunnarssyni og Inga Darvis Rodriguez var í H-riðli með Eistlandi, Möltu, Noregi og Úkraínu. Drengjaliðið sigraði Möltu 3-1, þar sem Ingi Darvis vann báða sína leiki og Gestur vann sinn leik. Ingi vann einnig leik á móti Noregi, þar sem hann lagði Fredrik Buringrud-Langen 3-1. Aðrir leikir töpuðust 0-3 en allir leikmennirnir unnu lotur.
Drengjaliðið leikur næst í O-riðli með Búlgaríu, Englandi og Lettlandi. Liðið er að keppa um sæti 29-44 og fer það eftir úrslitunum í riðlinum um hvaða sæti liðið leikur eftir að keppni í þessum riðli er lokið. Leikið verður 9. og 10. júlí.
Í meyjaliðinu leika Agnes Brynjarsdóttir og Harriet Cardew. Þær unnu báðar lotu en náðu ekki að vinna leik í E-riðli, þar sem þær mættu Eistlandi, Georgíu, Grikklandi og Slóveníu.
Þær Agnes og Harriet leika í P-riðli með Bosníu Herzegovínu og Ísrael þann 9. júlí. Þar er leikið um sæti 25-36.
Fylgst er með gengi íslensku leikmannanna á fésbókarsíðu BTÍ.
Á heimasíðu mótsins má sjá úrslit jafnóðum, og einnig er hægt að horfa á beina útsendingu af völdum leikjum. Sjá: https://www.ettu.org/en/events/european-youth-championships/general-information/
