A-lið Víkings hefur tryggt sér deildarmeistaratitilinn í 1. deild karla fyrir lokaumferðina

10. og síðasta umferð í deildarkeppni 1. deildar karla fyrir úrslitakeppnina fer fram 7. og 8. mars. A-lið Víkings hefur þegar tryggt sér deildarmeistaratitilinn. Liðið hefur fullt hús stiga, 18 stig eftir 9 leiki, fyrir lokaumferðina. Víkingur-A mætir KR-A í 10. umferðinni fimmtudaginn 8. mars. KR-A hefur 14 stig og dugar því ekki sigur í síðasta leiknum til að ná Víkingum að stigum.

HK-A er fallið í 2. deild fyrir síðustu umferðina. Liðið mætir Víkingi-D þann 7. mars en dugar ekki sigur í þeim leik til að halda sér í deildinni. Víkingur-D hefur 2 stig og hlutfall unninna og tapaðra leikja er 10:33 en HK-A hefur ekkert stig og hlutfallið 3:36.

Þann 7. mars leika einnig Vikingur-B og Víkingur-C, sem eru í 3. og 4. sæti deildarinnar.

ÁMU