Guðbjörg Vala og Magnús Gauti sigruðu á lokamóti BTÍ

Guðbjörg Vala Gunnarsdóttir, KR og Magnús Gauti Úlfarsson, BH, sigruðu á lokamóti BTÍ. Leikið var í Íþróttahúsi Hagaskóla þann 15. maí.

Í kvennaflokki léku Aldís Rún Lárusdóttir, KR og Guðrún Gestsdóttir, KR í öðrum undanúrslitaleiknum og sigraði Aldís 4-0. Hinum undanúrslitaleiknum lauk sömuleiðis 4-0 en þar vann Guðbjörg Vala Helenu Árnadóttur, KR.
Úrslitaleikinn léku því þær Aldís og Guðbjörg og vann Guðbjörg öruggan sigur 4-0. Þetta er fyrsta stóra mótið í efsta flokki sem hún vinnur.
Þær Kristín Ingibjörg Magnúsdóttir, KR og Magnea Ólafs, BM, höfnuðu í 5.-6. sæti.

Í undanúrslitum í karlaflokki mættust Magnús Gauti og Ellert Kristján Georgsson, KR, og hafði Magnús sigur í oddalotu. Í hinum leiknum léku Norbert Bedo, KR og Pétur Gunnarsson, KR. Norbert vann 4-1.
Í úrslitum vann Magnús Gauti Norbert í oddalotu og tryggði sér sigur á mótinu.
Í 5.-8. sæti voru Eiríkur Logi Gunnarsson, KR, Magnús Jóhann Hjartarson, Víkingi, Skúli Gunnarsson, KR og Þorbergur Freyr Pálmarsson, BH.

Átta efstu körlum og konum að loknum mótum á mótaröðinni í vetur var boðin þátttaka á mótinu. Sjá má keppendur á mótinu og dráttinn í annarri frétt frá 15. maí. Þar má einnig sjá styrktaraðila mótsins, en sigurvegararnir fengu peningaverðlaun og allir keppendur fengu gjafir frá styrktaraðilum mótsins.