Aldís og Davíð borðtennisfólk KR
Aldís Rún Lárusdóttir og Davíð Jónsson voru valin borðtennisfólk KR 2019. Tilkynnt var um valið á uppskeruhátíð Borðtennisdeildar KR þann 10. maí. Þá fékk Aldís viðurkenningu frá félaginu en Davíð er við nám erlendis og fær hana afhenta síðar.
Í umsögn stjórnar deildarinnar segir þetta um borðtennisfólk ársins:
Aldís Rún Lárusdóttir
Aldís varð tvöfaldur Íslandsmeistari í borðtennis vorið 2019. Hún sigraði í tvíliðaleik með Auði Tinnu Aðalbjarnardóttur og í tvenndarleik með Davíð Jónssyni. Þá fékk Aldís brons í einliðaleik á mótinu. Hún var í A-liði KR, sem komst í undanúrslit 1. deild kvenna vorið 2019, og tapaði aðeins einum einliðaleik í deildarkeppninni á keppnistímabilinu.
Aldís lék með landsliðiðinu á Arctic mótinu á Grænlandi í maí 2018 og hefur verið valin í landsliðið fyrir Smáþjóðaleikana 2019 og í A-landsliðið fyrir Arctic mótið 17.-19. maí 2019.
Auk þess hefur Aldís verið formaður Borðtennisdeildar KR undanfarin ár og verið öflugur leiðtogi borðtennisfólks innan félags sem utan.
Davíð Jónsson
Davíð varð Íslandsmeistari í tvenndarleik á Íslandsmótinu 2019 með Aldísi Rún Lárusdóttur. Þá varð Davíð í 2. sæti í einliðaleik og í 2. sæti í tvíliðaleik með Ingólfi Sveini Ingólfssyni á mótinu. Davíð stundar nám í Slóvakíu, og hefur því ekki tekið þátt í fleiri mótum á Íslandi á keppnistímabilinu.
Davíð var valinn í A-landsliðið fyrir Arctic mótið 17.-19. maí 2019 en komst ekki til landsins vegna prófa.
Á forsíðunni má sjá Aldísi með verðlaunin árið 2019 en hér fyrir neðan er Davíð í leik á Íslandsmótinu í mars. Mynd af vef BTÍ.
