Auður Tinna Aðalbjarnardóttir fékk brons í tvíliðaleik og fleiri Íslendingar í undanúrslitum á morgun
Keppni er lokið í tviliðaleik kvenna á Arctic mótinu í Færeyjum. Þar sigraði færeyska parið Henrietta Nielsen og Durita Jensen með 5 vinninga. Grænlenskt par varð í 2. sæti með 4 vinninga og Auður Tinna Aðalbjarnardóttir og Ingilli Petersen frá Grænlandi fengu brons, þær höfðu 2 vinninga. Aldís Rún Lárusdóttir og Sigrún Ebba Urbancic Tómasdóttir höfnuðu í 4. sæti en þær höfðu líka 2 vinninga, sem og grænlenska parið sem varð í 5. sæti.
Í tvíliðaleik karla var keppt fram að undanúrslitum. Jóhannes Bjarki Urbancic Tómasson og Kári Mímisson leika til undanúrslita á morgun við grænlensku bræðurna Aqqalu og Ivik Nielsen. Grænlensku bræðurnir sigruðu Pétur Martein Urbancic Tómasson og Tómas Inga Shelton í 8 manna úrslitum. Ingi Darvis Rodriquez og Magnús Gauti Úlfarsson leika einnig í undanúrslitum í tvíliðaleik en þeir sigruðu Sindra Þór Sigurðsson og Skúla Gunnarsson 16-14 í oddalotu í 8 manna úrslitum. Ingi og Magnús sigruðu í sínum riðli en þeir sigruðu m.a. grænlensku bræðurna í riðlinum. Jóhannes og Kári sigruðu líka í sínum riðli en Sindri og Skúli höfnuðu í 2. sæti í sínum riðli.
Aldís Rún Lárusdóttir og Jóhannes Bjarki Urbancic Tómasson leika í 8 manna úrslitum í tvenndarleik, þar sem þau mæta Henriettu Nielsen og Pætur Albinus frá Færeyjum.
Í einliðaleik kvenna hafnaði Aldís Rún Lárusdóttir í 5.-8. sæti en Auður Tinna Aðalbjarnardóttir og Sigrún Ebba Urbancic Tómasdóttir komust ekki upp úr riðlinum.
Keppni í einliðaleik karla fer öll fram sunnudaginn 14. maí.
Fleiri myndir og umfjöllun má sjá á Facebook síðu BTÍ.
Á forsíðumyndinni má sjá systkinin Pétur Martein, Jóhannes Bjarka og Sigrúnu Ebbu, sem öll eru að keppa fyrir Íslands hönd í Færeyjum. Það er sjaldgæft í hvaða íþrótt sem er að þrjú systkini leiki saman með landsliði.
ÁMU (uppfært 14.5.)
