BH-A og Víkingur deildarmeistarar í Raflandsdeildinni
Deildarmeistarar í Raflandsdeild karla 2018-2019 er A-lið BH og í Raflandsdeild kvenna lið Víkings. Þetta var ljóst eftir að lokaumferðir Raflandsdeildarinnar voru leiknar í Íþróttahúsi Hagaskóla laugardaginn 2. febrúar.
Hafnfirðingar unnu deildarmeistaratitilinn í fyrsta skipti síðan byrjað var að veita þann titil vorið 2010, en til þessa hafa eingöngu KR-ingar og Víkingar orðið deildarmeistarar, hvort sem litið er til karla- eða kvennadeildarinnar. Voru leikmenn BH vel að titilinum komnir enda töpuðu þeir ekki leik í deildinni og fengu 20 stig. Liðið skipuðu Birgir Ívarsson, Jóhannes Bjarki Urbancic Tómasson, Magnús Gauti Úlfarsson og Pétur Marteinn Urbancic Tómasson. Magnús Gauti er taplaus í deildinni og hefur unnið alla 13 leikina sem hann hefur leikið, en þá eru bæði einliða- og tvíliðaleikir taldir með.
Í 2. sæti varð A-lið Víkings með 16 stig, en Víkingar urðu deildarmeistarar í fyrra. A-lið KR varð í 3. sæti með 12 stig og A-lið HK í 4. sæti með 6 stig. Þessi fjögur lið mætast í úrslitakeppninni og leikur BH-A við HK-A og Víkingur-A við KR-A.
B-lið KR varð í 5. sæti deildarinnar með 4 stig. og leikur umspilsleik við liðið sem hafnar í 2. sæti í 2. deild um sæti í 1. deild á næsta keppnistímabili. B-lið HK fellur í 2. deild en liðið hlaut 2 stig í deildinni.
Í Raflandsdeild kvenna var keppni jöfn og spennandi en Víkingskonur stóðu uppi sem deildarmeistarar með 18 stig. Liðið skipuðu Agnes Brynjarsdóttir, Nevena Tasic, Stella Karen Kristjánsdóttir og Þórunn Ásta Árnadóttir. Agnes er aðeins 12 ára og yngsti deildarmeistarinn í borðtennis til þessa. Nevena vann alla sjö leikina sem hún lék í deildinni. Ársól Clara Arnarsdóttir vann alla 7 einliðaleikina sem hún lék í deildinni.
Deildarmeistarar síðustu fjögurra ára, KR-A, höfnuðu í 2. sæti í deildinni með 18 stig, eins og Víkingur, en höfðu verra hlutfall unninna og tapaðra leikja. B-lið KR varð í 3. sæti með 10 stig og BH í 4. sæti, sömuleiðis með 10 stig, en KR-B hafði betra hlutfall unninna og tapaðra leikja. Þessi fjögur lið leika í úrslitakeppninni og mætast Víkingur og BH annars vegar og KR-A og KR-B hins vegar.
C-lið KR varð svo í 5. sæti deildarinnar með 4 stig og lið Umf. Samherja fékk ekkert stig.
Verðlaunahafar í Raflandsdeild karla: Lið Víkings-A vantar á myndina, sem og Ingólf Ingólfsson, KR og Birgi Ívarsson, BH. Tómas Ingi Shelton, þjálfari BH er með á myndinni.
Verðlaunahafar í Raflandsdeild kvenna: Aldísi Rún Lárusdóttur, KR-A og Þórunni Ástu Árnadóttur, Víkingi, vantar á myndina.
Úrslit úr leikjum í 9. og 10. umferð.
Raflandsdeild karla
Víkingur – KR A 3-1
HK B – BH 0-3
HK A – KR B 2-3
HK B – KR B 3-1
BH – KR A 3-1
Víkingur – HK A 3-0 (HK var aðeins með einn leikmann og gaf því leikinn)
Raflandsdeild kvenna
KR B- Víkingur 0-3
Samherjar – KR C 0-3 (Samherjar mættu ekki)
KR A – BH 3-0
Víkingur – KR C 3-0
BH – KR B 3-1
KR A – Samherjar 3-0 (Samherjar mættu ekki)
Öll úrslit úr leikjum deildarinnar og tölur um árangur einstakra leikmanna má sjá á vef Tournament Software, http://www.tournamentsoftware.com/sport/tournament.aspx?id=5F6B23C6-A4BF-4DD7-9579-BCBF9F513EEE
Myndir frá Ingimar Ingimarssyni.
ÁMU (uppfært 3.2.)
