BH deildarmeistari kvenna í fyrsta skipti

Lið BH varð deildarmeistari í fyrsta skipti, eftir spennandi keppni í deildakeppni í Íþróttahúsinu við Strandgötu í dag. Þetta er í fyrsta skipti sem BH verður deildarmeistari og í fyrsta skipti síðan árið 1990 að hvorki KR né Víkingur verður deildarmeistari í 1. deild kvenna.

BH og ríkjandi Íslands- og deildarmeistarar Víkings skildu jöfn í fyrstu umferðinni. Eftir að liðin fjögur í 1. deild kvenna, Gullfiskdeildinni, höfðu öll leikið innbyrðis, voru bæði BH og Víkingur með 5 stig, höfðu unnið 17 leiki og tapað 7. Þá þurfti að telja unnar og tapaðar lotur, og þar hafði BH talsvert betra hlutfall, og varð því deildarmeistari. Lið BH skipuðu Kristín Ingibjörg Magnúsdóttir, sem var á láni frá KR, Sól Kristínardóttir Mixa og Vivian Huynh.
A-lið KR varð í 3. sæti með 2 stig og B-lið KR varð neðst án stiga, og fellur í 2. deild, verði leikið í tveimur deildum á næsta keppnistímabili.
Liðin í verðlaunasætum fengu harðfisk frá styrktaraðila deildarinnar.

BH og Víkingur leika því úrslitaleik um Íslandsmeistaratitilinn í 1. deild kvenna í apríl.

Einnig var keppt í 2. deild kvenna og voru alls 40 konur skráðar í liðin í deildakeppninni í dag.

Úrslit úr einstökum leikjum
Víkingur – BH 5-5
KR-A – KR-B 6-1
Víkingur – KR-B 6-1
KR-A – BH 2-6
Víkingur – KR-A 6-1
KR-B – BH 0-6