BH og Víkingur Íslandsmeistarar í Raflandsdeildinni
A-lið BH varð Íslandsmeistari í 1. deild karla og Víkingur í 1. deild kvenna eftir úrslitaleiki í Raflandsdeildinni, sem fram fóru í Íþróttahúsinu við Strandgötu í Hafnarfirði laugardaginn 13. apríl. Þetta var í fyrsta skipti sem BH verður Íslandsmeistari í 1. deild karla en Víkingskonur unnu síðast í 1. deild kvenna fyrir fimm árum síðan.
Í karlaleiknum mættust liðin, sem urðu í efstu tveimur sætunum í deildinni en sömu lið mættust í úrslitakeppninni í fyrra. Tveir stigahæstu leikmennirnir á styrkleikalistanum mættust í fyrsta leik. Magnús Gauti Úlfarsson, BH sigraði Magnús K. Magnússon, Víkingi 11-7 í oddalotu eftir vel leikinn leik. Þá léku Birgir Ívarsson, BH og Magnús Jóhann Hjartarson, Víkingi. Aftur var leikurinn jafn og spennandi og lauk með 11-8 sigri Magnúsar í oddalotu, og staðan í leiknum því jöfn, 1-1. Í tvíliðaleiknum léku Birgir og Jóhannes Bjarki Urbancic Tómasson fyrir BH en Magnús Jóhann og Ingi Darvis Rodriguez fyrir Víking. BH vann nokkuð öruggan 3-0 sigur og staðan orðin 2-1 fyrir BH. Þá léku Magnús Gauti og Ingi og enn fór leikurinn í oddalotu. Þar sigraði Magnús Gauti 11-6 og tryggði BH Íslandsmeistaratitilinn í fyrsta skipti. Pétur Marteinn Urbancic Tómasson, BH og Sindri Þór Sigurðsson, Víkingi, voru einnig leikmenn í liðunum.
Í úrslitaleiknum í kvennadeildinni voru ungu konurnar áberandi og aðeins ein af átta í liðunum fædd á síðustu öld. Hinar sjö eru fæddar 2001-2006. Nevena Tasic úr Víkingi hefur ekki tapað leik í vetur og á því varð ekki breyting þegar hún sigraði Kristínu Ingibjörgu Magnúsdóttur örugglega 3-0. Næst léku Agnes Brynjarsdóttir fyrir Víking og Lóa Floriansdóttir Zink fyrir KR-B. Leikurinn var mjög jafn og lauk flestum lotunum með tveggja stiga mun. Lóa var 2-1 yfir í lotum og hafði 10-7 forystu í fjórðu lotunni en náði ekki að innbyrða sigurinn og Agnes kom til baka og vann lotuna. Oddalotunni lauk svo með 11-9 sigri Agnesar og staðan 2-0 fyrir Víking. Í tvíliðaleiknum léku Agnes og Stella Karen Kristjánsdóttir fyrir Víking og Lóa og Þóra Þórisdóttir fyrir KR. Víkingur vann tvær fyrstu loturnar og þurfti aðeins eitt stig í þriðju lotunni til að innbyrða sigurinn. KR-stúlkurnar knúðu fram sigur í lotunni og unnu svo fjórðu lotuna. Víkingsstúlkurnar unnu svo öruggan sigur í oddalotunni og fögnuðu fyrsta titli félagsins í fimm ár. Engin þessara leikmanna hefur áður unnið Íslandsmeistaratitil í deildinni. Auk þeirra sem léku í dag er Þórunn Ásta Árnadóttir í liði Víkings og Lára Ívarsdóttir í liði KR.
Umgjörðin um úrslitaleikina var einstaklega glæsileg af hálfu BH og BTÍ. Leikirnir voru sýndir beint á vefnum og var þeim lýst. Auður Tinna Aðalbjarnardóttir hafði umsjón með lýsingunum og fékk til sín viðmælendur. Hægt er að horfa útsendingarnar og er slóðin á fésbókarsíðu BTÍ og hér fyrir neðan. Tveir landsdómarar voru á hverjum leik. Þá var áhorfendum boðið upp á veitingar.
Fleiri og betri myndir væntanlegar.
ÁMU
