Borðtennisæfingar hafnar á Kirkjubæjarklaustri

Í lok vors fékk Borðtennissamband Íslands veður af því að borðtennisæfingar hefðu hafist á Kirkjubæjarklaustri í 1. tölublaði ársins hjá Skinfaxa, tímariti UMFÍ – en í blaðinu var líka fjallað um borðtennishelgi á Reyðarfirði sem BTÍ styrkti.

Samkvæmt Sigurði Eyjólfi Sigurjónssyni, íþrótta- og æskulýðsfulltrúa Skaftárhrepps, sem er umsjónarmaður æfinganna, hófust vikulegar fjölskylduæfingar á fimmtudagskvöldum í janúar 2023 og hafa haldið áfram síðan, með sumarfríum. Hægt er að æfa bæði badminton og borðtennis í salnum og taldi hópurinn sem mætti veturinn 2023-2024 u.þ.b. 12-15 manns, þeir yngstu 10 ára og þeir elstu á sjötugsaldri. Tvö borðtennisborð eru í íþróttahúsinu og það þriðja í grunnskólanum.

Íþróttafélagið sem heldur utan um starfið fékk nýverið heitið Ungmennafélagið Ás við sameiningu Umf. Ármanns og Umf. Skafta: Forsíða – Ungmennafélagið ÁS (umfas.is)

BTÍ býður UMF Ás hjartanlega velkomið í borðtennisheiminn og vonast til að senda þjálfara á svæðið til að aðstoða við fræðslu og uppbyggingu á komandi keppnisári. Þá er staðsetning félagins spennandi, þar sem það er á milli hinnar rótgrónu borðtennisdeildar Dímonar á Hvolsvelli og nýs borðtennisstarfs UMF Neista á Djúpavogi.

Myndin er af íþróttahúsinu á Kirkjubæjarklaustri.