Borðtennismaður mánaðarins er Guðrún Gestsdóttur
Borðtennissamband Íslands fagnar iðkendum sem leggja hart að sér og byggja upp okkar fjölbreytta og góða samfélag. Í nóvember 2025 er það Guðrún Gestsdóttir sem hlýtur nafnbótina borðtennismaður mánaðarins en hún hefur verið ómissandi þátttakandi í hreyfingunni undanfarin ár og hlaut fjölda tilnefninga, ekki síst frá stelpum í íþróttinni sem tóku það fram að hún hafi verið þeim hvetjandi fyrirmynd. Guðrún, kölluð Rúna, er KR-ingur og hefur setið í stjórn BTÍ frá árinu 2023 og sem varaformaður frá 2024.
Rúna byrjaði ekki sem borðtenniskona – hún er er körfuboltakona í grunninn. Hún æfði körfubolta á háu stigi í mörg ár hjá KR og var um nokkurra ára skeið í landsliðinu. Um þetta sagði hún: „Körfubolti er mín íþrótt. En núna er ég svolítið að svissa yfir, af því að mér fannst svo gaman að kynnast íþrótt sem ég gat bætt mig í.“ Þessi misserin æfir Rúna borðtennis tvisvar í viku og körfubolta með vinkonum sínum einu sinni í viku.
Rúna sagði frá því að hún hefði rifið á sér kálfavöðvann í kringum fertugt og að það hafi verið eftir hvatningu Kristjáns Viðars Haraldssonar, þáverandi yfirþjálfara KR í borðtennis, að hún prófaði borðtennis. Viddi benti henni á að prófa öðlingaæfingar vegna þess að það væri góð hreyfing og styrkjandi fyrir ökklann og kálfann. „Þannig að þar byrjaði minn borðtennisferill,“ útskýrir Rúna. „Og mér fannst bara alveg ótrúlega gaman að kynnast íþrótt þar sem ég gat leikið mér og keppt og tekið framförum.“
Hér kann að hafa spilað inn í líka að elstu synir Rúnu, Pétur og Skúli Gunnarssynir voru byrjaðir að æfa borðtennis á þessum tíma, en líkt og áður hefur verið greint frá á heimasíðu BTÍ þá hafa börnin hennar fimm öll stundað borðtennis og hefur meira að segja verið fjallað um árangur þeirra á vettvangi Evrópska borðtennissambandsins.
Rúna er alls ekkert gúmmí nörd: „Nei, sko síður en svo, ég eiginlega veit ekkert um gúmmí, og veit ekki hvernig gúmmí ég er með. . Þoli ekki takkaog heldur ekki snúninga.“ Hún gengur svo langt að velta því upp hvort borðtennis væri skemmtilegri án gúmmís og snúninga. „Allir væru bara með eins spaða.“ segir hún. Fréttaritari veltir því fyrir sér við þessi orð hvort ekki sé tilefni til að efna til svokallaðrar hardbat keppni (keppt án gúmmís) á móti í KR á næstunni!
Rúna fær stundum ný gúmmí sem gjöf frá fjölskyldu sinni – jólagjafir og afmælisgjafir – þegar börnum hennar, sem öll eru borðtennismenn, blöskrar staðan á spaðanum hennar: „Ég fæ stundum ný gúmmí af því ég er með gott bakland.“
Rúna hefur enga eiginlega hjátrú eða hefðir fyrir leiki, en hún reynir að fylgja ráðum eiginmanns síns Gunnars Skúlasonar, sem á langan feril að baki í knattspyrnu, og nokkurn í borðtennis: „„Bara mundu kassann fram og gleðina með.“ Taka þessu ekki of alvarlega af því að maður náttúrulega er alltaf að tapa.“
Spurð um uppáhalds borðtennissigra, nefnir Rúna enga ákveðna, en segir að henni þyki einna skemmtilegast að spila við vinkonu sína Önnu Sigurbjörnsdóttur, sem er jafnaldra hennar og æfir einnig í KR. „Við spilum oft jafna og skemmtilega leiki. Svo væri auðvitað óskandi að fleiri konur myndu mæta á keppnisvöllinn.“
Rúna segist ekki eiga svo marga sigra en sé að vinna í því. Engu að síður hefur hún unnið Íslandsmeistaratitilinn í öðrum flokki kvenna og nokkra einliðaleiks- og tvíliðaleikstitla á Íslandsmóti öldunga.
Rúna hefur farið í margar borðtennisferðir, flestar sem foreldri. Eftirminnilegustu ferðina segir hún hafa verið til Færeyja þegar hún gleymdi ferðatöskunni sinni úti á götunni heima!
Hvað erlendar fyrirmyndir varðar segist Rúna ekki beinlínis eiga sér neina, en nefnir þó Ninu Mittelham frá Þýskalandi – sem gisti heima hjá henni ásamt bróður sínum ein jólin fyrir tilstuðlan Skúla, sonar hennar, en þau Nina kynntust á móti erlendis og hún vildi gjarnan heimsækja Ísland. Síðan þá spyr Rúna börn sín reglulega um árangur Ninu, sem er þó nokkur: „Hún er með fremstu konum í Þýskalandi.“ Nina hefur í þrígang orðið Evrópumeistari liða með Þýskalandi og hæsta staða hennar á heimslistanum var 12. sæti.
Þegar Rúna er spurð um leikmenn eða þjálfara sem hafi haft áhrif á hana svarar hún: „Já, það er náttúrulega Viddi. Af því að hann kemur mér af stað.“ Hún nefnir einnig syni sína sem stundum reyna að segja henni eitthvað til. Rúna telur einnig þá sem hún æfir með í öðlingahópnum í KR til fyrirmynda sinna, ekki síst þá sem eldri eru.
Rúna, verandi körfuboltakona í grunninn, viðurkennir að hún sé ekki alveg sannfærð um að borðtennis sé besta íþróttin. Það sem henni þykir borðtennis þó hafa fram yfir margar aðrar íþróttir er að allir geta stundað borðtennis á sínum forsendum og meiðslahætta er tiltölulega lítil. Borðtennis er frábær fyrir samhæfingu hugar og handa, og svo má ekki gleyma því að það er gott og gefandi að tilheyra borðtennis samfélaginu á Íslandi.
Hvaða borðtennismaður þykir þér eiga að fá viðurkenningu? Fylltu út formið hér að neðan!
