Fjórir landsliðsmenn tóku þátt í Preston Grand Prix

Fjórir karlar úr landsliðshópnum léku á Preston Grand Prix mótinu í Englandi fyrstu helgina í nóvember. Karlarnir sem kepptu voru Birgir Ívarsson, BH, Ellert Kristján Georgsson, KR, Magnús Gauti Úlfarsson, BH og Óskar Agnarsson, HK.

Karlarnir léku fyrri daginn í flokkum sem kallast “band 1” og “band 2” en alls var spilað í 7 flokkum á mótinu (“band” 1 til “band 7”). Þeir Magnús Gauti og Birgir komust báðir upp úr riðli í “band 2” og þeir Ellert og Óskar unnu báðir einn leik 3-0 í sínum riðlum. Í “band 1” komst Magnús Gauti í 8 manna úrslit eftir að hafa unnið Englandsmeistarann í drengjaflokki en tapaði þar á móti varnarspilara 3-2. Ellert komst upp úr riðli í “band 1”.

Seinni daginn var keppt í stærsta flokknum, opnum flokki karla, og í flokki 21-39 ára, en ekki hefur tekist að finna úrslit úr þessum flokkum á vefnum.

Byggt á frétt af fésbókarsíðu BTÍ og þaðan kemur myndin.