Gerð kennslumyndbands í borðtennis
Útbreiðslunefnd BTÍ auglýsir eftir áhugasömum einstaklingi í gerð kennslumyndbands á íslensku fyrir leikmenn og þjálfara. Kennslumyndbandinu er ætlað að sýna rétta tækni í helstu grunnhöggum (t.d. slá og skera með forhönd og bakhönd), uppgjöfum, fótastöðu og fjalla um reglur íþróttarinnar.
Um er að ræða stutt og auðskiljanleg myndbönd sem komið verður á YouTube-rás Borðtennissambandsins. Hvert myndband á að vera um 1-3 mínútur þar sem eitt-, eða nokkur högg sem rökrétt er að hópa saman, eru tekin fyrir. Markmiðið með myndböndunum er að búa til aðgengilegan vettvang fyrir leikmenn og þjálfara að nálgast leiðbeiningar fyrir rétta undirstöðutækni og líkamsbeitingu í borðtennis.
BTÍ greiðir 25.000 fyrir fullgerð myndbönd sem tilbúin eru til upphleðslu á YouTube-rás BTÍ. Umsóknum og ábendingum skal beina til [email protected]. Umsóknarfrestur er til og með 4. febrúar. Úhlutun verksins fer fram í síðasta lagi 6. febrúar. Öllum umsóknum verður svarað í tölvupósti.
Umsækjendum er frjálst að koma fram með sínar eigin hugmyndir um framsetningu myndbandanna. Líta má til sambærilegra myndbanda frá öðrum sérsamböndum eða frá ITTF, eins og myndbandaröðin Spins ‘n’ Skills.
