Góður árangur hjá íslensku strákunum í Riga

Íslensku keppendurnir þrír, sem leika á Riga City Council Cup í Riga í Lettlandi, hófu keppni í dag. Þeir komust allir upp úr sínum riðlum og í útsláttarkeppnina. Leikið var um hvert sæti, og því fengu þeir marga leiki úr út deginum.

Matthia Contu unglingalandsliðsþjálfari er með liðinu í Riga, og hver þeirra er líka með foreldri með sér.

Bestum árangri íslensku leikmannanna í dag náði Benedikt Jiyao Davíðsson, sem varð í 5. sæti í flokki 11 ára og yngri (fæddir 2012 og síðar), en 27 keppendur voru í flokknum. Benedikt vann sinn riðil og lagði þar leikmann frá Lettlandi og annan frá Litháen.
Í 16 manna úrslitum sigraði Benedikt leikmann frá Lettlandi 3-0 en tapaði 1-3 í 8 manna úrslitum fyrir leikmanni frá Litháen. Hann lék því um sæti 5-8. Fyrst vann hann dreng frá Lettlandi 3-0 og loks annan Letta 3-1, og tryggði sér þar með 5. sætið. Benedikt er fæddur árið 2014, og á því enn tvö ár eftir í þessum flokki og var með yngstu keppendum í flokknum.

Kristján Ágúst Ármann og Lúkas André Ólason léku í flokki pilta 13 ára og yngri (fæddir 2010 og síðar) og voru keppendur 36.
Kristján varð í 2. sæti í sínum riðli. Hann vann tvo leikmenn frá Lettlandi og einn frá Litháen en varð að játa sig sigraðan gegn leikmanni frá Azerbaijan.
Í 16 manna úrslitum tapaði hann fyrir norskum leikmanni. Næst mætti hann lettneskum leikmanni í leik um sæti 9-16 og vann hann 3-1. Hann lék því um sæti 9-12 og tapaði 1-3 fyrir eistneskum leikmanni. Lokaleikurinn var því um sæti 11, þar sem Kristján vann leikmann frá Eistlandi 3-1 og varð því í 11. sæti.

Lúkas varð líka í 2. sæti í sínum riðli. Hann vann tvo lettneska leikmenn en tapaði fyrir leikmanni frá Moldóvu. Hann mætti finnskum leikmanni í 16 manna úrslitum og tapaði. Í leik um sæti 9-16 tapaði hann fyrir leikmanni frá Eistlandi og lék því um sæti 13-16. Hann tapaði fyrir 1-3 fyrir leikmanni frá Lettlandi og lokaleiknum gegn leikmanni frá Litháen og varð í 16. sæti.

Drengirnir halda áfram keppni laugardaginn 28. október.

Forsíðumynd af Benedikt Jiyao á verðlaunapalli, frá Davíð föður hans.

Mynd inni í fréttinni af drengjunum með Mattia unglinglandsliðsþjálfar, tekin í Leifsstöð við brottför.