Guðbjörg Vala vann einliðaleik á móti Englandi
Síðustu leikirnir í liðakeppni á EM unglinga í Ostrava í Tékklandi voru leiknir 15. júlí, en þann 16. júlí hefst keppni í einstaklingsgreinum.
Guðbjörg Vala Gunnarsdóttir vann fyrri einliðaleik sinn gegn Englandi, en meyjaliðið tapaði leiknum 1-3. Sveina- og drengjaliðið töpuðu sínum leikjum 0-3. Það hefur ekki oft gerst, ef nokkurn tímann, að íslenskur leikmaður vinni leik á móti Englandi í landsleik.
Úrslit leikja í liðakeppninni 15. júlí:
Meyjalið 15 ára og yngri
Ísland – England 1-3
Guðbjörg Vala vann fyrri einliðaleik sinn 3-1 en tapaði þeim seinni 1-3. Tvíliðaleikurinn hjá Guðbjörgu Völu og Helenu tapaðist sömuleiðis 1-3.
Ísland lauk keppni í 3. sæti af 5 liðum í O-riðli og hefur væntanlega spilað um 29. sæti vð Bosníu-Herzegóvínu en úrslit úr þeim leik hafa ekki borist.
England vann alla fjóra leiki sína í riðlinum, en Lettland varð í 2. sæti með tvo sigra, eins og Ísland.
Sveinalið 15 ára og yngri
Ísland – Írland 0-3
Þeir Kristján og Lúkas töpuðu báðir einliðaleikjum sínum 1-3 en tvíliðaleikurinn tapaðist 0-3.
Liðin mættust í keppni um sæti 37-40. Eftir tapið átti Ísland að leika við Möltu um sæti 39 en úrslit úr þeim leik liggja ekki fyrir.
Drengjalið 16-18 ára
Ísland – Kýpur 0-3
Benedikt Aron tapaði sínum einliðaleik naumlega 10-12 í oddalotu, en aðrir leikir fóru 0-3.
Ísland og Kýpur voru að keppa um 38. sæti en með tapinu hafnaði Ísland í 39. og síðasta sæti í flokknum.
Keppni í einstaklingsgreinum hefst 16. júlí. Keppt er í riðlum í einliðaleik en með útslætti í tvíliðaleik og tvenndarleik.
Sveinarnir ríða á vaðið þegar þeir hefja keppni einliðaleik kl. 10 og keppa aðrir leikmenn Íslands hver á fætur öðrum í kjölfarið. Sól Kristínardóttir Mixa hefur keppni á mótinu, enda tekur hún aðeins þátt í einstaklingsgreinum.
Hér má fylgjast með leikjunum á mótinu og sjá úrslit í einstökum viðureignum: https://www.ettu.org/european-youth-championships/.
Forsíðumynd af Guðbjörgu Völu af myndavef ETTU.
