KR-A sigraði Víking-A í fyrsta úrslitaleiknum í 1. deild karla
KR-A sigraði Víking-A 4-1 í fyrsta úrslitaleiknum í 1. deild karla í Íþróttahúsi Hagaskóla 3. apríl. Leikirnir voru flestir jafnir og spennandi og lauk þremur síðustu leikjunum í oddalotu.
Breki Þórðarson byrjaði vel fyrir KR-inga með nokkuð óvæntum sigri á Íslandsmeistaranum Magnúsi K. Magnússyni.
Kári Mímisson sigraði svo Magnús Jóhann Hjartarson örugglega 3-0.
Í þriðja leiknum mættust Skúli Gunnarsson og Sindri Þór Sigurðsson. Skúli vann tvær fyrstu loturnar en Sindri gafst ekki upp og vann tvær þær næstu. Í oddalotunni var Skúli kominn í 10-7 en Sindri náði að jafna og knýja fram sigur í framlengingu.
Í tvíliðaleiknum byrjuðu Víkingar betur og unnu tvær fyrstu loturnar en KR vann þá þriðju. Víkinga vantaði aðeins eitt stig til að vinna leikinn í fjórðu lotunni en Kárarnir komu til baka og unnu leikinn svo örugglega í oddalotunni.
Sagan endurtók sig í leik Kára Mímissonar og Magnúsar Kristins. Magnús vann tvær fyrstu loturnar nokkuð örugglega en Kári vann þriðju lotuna. Í fjórðu lotunni var Magnús kominn í 10-8 en Kári náði að knýja fram sigur. Kári var á undan upp í 10 í oddalotunni en Magnús jafnaði. Lengra komst Magnús ekki og Kári vann 12-10 og tryggði KR sigur í leiknum.
Annar leikur liðanna verður á heimavelli Víkings í TBR-húsinu miðvikudaginn 5. apríl kl. 20.
Úrslit úr einstökum leikjum
KR-A – Víkingur-A 4-1
- Breki Þórðarson – Magnús K. Magnússon 3-1 (6-11, 11-9, 11-6, 13-11) 1-0
- Kári Mímisson – Magnús Jóhann Hjartarson 3-0 (11-5, 11-8, 11-6) 2-0
- Skúli Gunnarsson – Sindri Þór Sigurðsson 2-3 (11-7, 11-7, 4-11, 9-11, 11-13) 2-1
- Kári Ármannsson/Kári M. – Magnús K./Sindri 3-2 (7-11, 8-11, 11-4, 13-11, 11-4) 3-1
- Kári Mímisson – Magnús K. Magnússon 3-2 (7-11, 7-11, 11-7, 12-10, 12-10) 4-1
ÁMU
