KR vann flesta Íslandsmeistaratitla keppnistímabilið 2015-2016
Á keppnistímabilinu 2015-2016 var keppt um 50 Íslandsmeistaratitla. KR vann flesta titla eða 21 talsins. Víkingur vann næstflesta titla eða 14,5. Önnur félög sem unnu til Íslandsmeistaratitla á árinu voru BH (5,5), HK (3,5), Örninn (2,5), Umf. Hekla (2) og Umf. Samherjar (1). Víkingar unnu flesta titla í fullorðisflokkum og öldungaflokkum en KR vann flesta titla í unglingaflokkum, sjá meðfylgjandi skjal: Islandsmeistaratitlar_2016
Fimm leikmenn unnu fjóra Íslandsmeistaratitla á keppnistímabilinu: Birgir Ívarsson, BH, Magnús Gauti Úlfarsson, BH, Pétur Gunnarsson, KR, Sigrún Ebba Tómasdóttir, KR og Sveina Rósa Sigurðardóttir, KR. Pétur og Sveina unnu ferfalt í sínum unglingaflokki. Magnús Gauti og Sigrún Ebba unnu þrefalt í sínum unglingaflokki en auk þess var Magnús Gauti í sigurliði BH í 2. deild og Sigrún var í sigurliði KR í 1. deild kvenna. Birgir var sömuleiðis í sigurliði BH í 2. deild og sigraði í 1. flokki karla auk tveggja titla sem hann vann í unglingaflokki.
Daði Freyr Guðmundsson úr Víkingi og Guðrún G Björnsdóttir úr KR unnu flesta Íslandsmeistaratitla í meistaraflokki, þrjá talsins hvort um sig.
Íslandsmeistaratalið með meisturum ársins 2016 verður sett inn á vefinn fljótlega undir Nýtt á bordtennis.is en er aðgengilegt hér: Islandsmeistaratal_1971-2016
Á Íslandsmóti unglinga og í flokkakeppni unglinga voru veittir Íslandsmeistaratitilar í öllum flokkum þar sem voru skráðir keppendur. Það var ekki gert á Íslandsmóti öldunga, þar sem aðeins var eitt skráð par í fimm flokkum í tvíliðaleik. Í fjórum tilfellum voru flokkar sameinaðir en í fimmta tilfellinu lék ólöglegt par við parið sem var skráð. Í þessum tölum eru öll þessi fimm löglega skráðu pör talin vera Íslandsmeistarar, til samræmis við það sem var gert í unglingaflokkum, þar til stjórn BTÍ hefur úrskurðar hverjir skuli teljast Íslandsmeistarar í öðlingaflokki:
- Árni Siemsen úr Erninum og Pétur Stephensen úr Víkingi voru eina parið í tvíliðaleik karla 60-69 ára en töpuðu úrslitaleik við eina parið í flokki 50-59 ára.
- Guðrún Gestsdóttir, KR og Guðrún Ólafsdóttir, KR voru eina parið í tvíliðaleik 40-49 ára kvenna en töpuðu úrslitaleik við eina parið í flokki 50-59 ára kvenna.
- Jóhann Örn Sigurjónsson, Erninum og Ragnar Ragnarsson, Erninum voru eina löglega parið í flokki 70-79 ára karla og sigruðu ólöglegt par, sem lék við þá.
Á forsíðumyndinni má sjá Magnús Gauta og Birgi á mynd Ingimars Ingimarssonar.
ÁMU
