Landsmót UMFÍ 50+ í Vogum 8. júní

Eins og áður var auglýst í dagatali BTÍ fer landsmót UMFÍ 50+ fram í Vogum á Vatnsleysuströnd helgina 6.-9. júní nk.

Borðtennismót leikanna fer fram í íþróttasal íþróttamiðstöðvarinnar Vogum kl. 11:00-14:00 laugardaginn 8. júní. Keppt verður í kvennaflokki 50 ára og eldri og karlaflokki 50 ára og eldri. Lágmarksfjöldi þátttakenda í flokki er 2.

Keppnisfyrirkomulagið er þannig að keppt verður í riðlum og fara efstu tveir leikmenn úr hverjum riðli og keppa í einföldum útslætti (ef fleiri en einn riðill er í flokki). Raðað verður í riðla samkvæmt styrkleikalista, sbr. 17. gr. keppnisreglna BTÍ. Mótið gildir til stiga á styrkleikalistanum. Leikmaður þarf að vinna 3 lotur til að vinna viðureignina, bæði í riðlunum og í útsláttarkeppninni.

Leikið verður með hvítum Stiga 3 stjörnu kúlum og veitir UMFÍ medalíur sem verðlaun fyrir þrjú efstu sætin í hvorum flokki.

Mótsstjóri er Jón Gunnarsson, BR (s: 892-5857) og yfirdómari verður Bjarni Þorgeir Bjarnason.

Dregið verður í mótið í húsnæði BR í Keflavík 4. júní nk. kl. 17 en skráningarfrestur er til klukkan 16 þann 3. júní nk. Skráning fer fram á heimasíðu UMFÍ og veitir þátttökugjaldið, 5.500 kr., rétt til þáttöku í öllum 19 keppnisgreinum landsmótsins.