Leikmenn úr landsliðshópnum keppa í Gautaborg – sigur hjá Sól
Sex leikmenn úr landsliðshópnum taka þátt í móti í Gautaborg helgina 4.-6. júní. Leikmennirnir eru Aldis Rún Lárusdóttir, KR, Björn Gunnarsson, HK, Gestur Gunnarsson, KR, Óskar Agnarsson, HK, Sól Kristínardóttir Mixa, BH og Stella Karen Kristjánsdóttir, Víkingi. Kári Mímisson er með hópnum á mótinu og hefur sett inn pistil um árangur dagsins á fésbókarsíðu BTÍ. Þá er Peter Nilsson, landsliðsþjálfari, með hópnum á mótinu.
Mótið kallast Klubbresornas Klubbresa 2022, og má sjá úrslitin úr leikjum á mótinu hér: http://resultat.ondata.se/000852/
Leikmennirnir keppa hver um sig í nokkrum flokkum.
Helstu úrslitin þann 4. júní voru þessi:
Sól sigraði í kvennaflokki (Flickor Dam). Hún vann líka sinn riðil í flokknum Max 999 og komst í undanúrslit, þar sem hún tapaði í oddalotu.
Aldis vann sinn riðil í kvennaflokki (Flickor Dam) en féll úr leik i 8 manna úrslitum. Hún vann líka sinn riðil í flokknum Max 999 en féll úr leik í 8 manna úrslitum eftir tap gegn sigurvegaranum í flokknum.
Stella vann sinn riðil í kvennaflokki (Flickor Dam) en féll úr leik i 8 manna úrslitum.
Strákarnir léku í flokknum Max 1999. Þeir Gestur og Óskar unnu leik en hefðu þurft að vinna tvo leiki til að komast upp úr riðlinum.
Leikið verður áfram sunnudaginn 5. júní.
