Magnús Jóhann og Nevena Íslandsmeistarar í meistaraflokki
Magnús Jóhann Hjartarson og Nevena Tasic, Víkingi, urðu Íslandsmeistarar í einliðaleik í meistaraflokki á Íslandsmótinu 2022, sem fram fór í Íþróttahúsinu við Strandgötu í Hafnarfirði 4.-6. mars.
Nevena varð þrefaldur meistari því hún sigraði í tvíliðaleik kvenna með Stellu Karen Kristjánsdóttur og í tvenndarleik með Inga Darvis Rodriguez, báðum úr Víkingi,
Magnús Jóhann og Ingi Darvis urðu Íslandsmeistarar í tvíliðaleik karla.
Daníel Bergmann Ásmundsson, Víkingi, sigraði í 1. flokki karla, Stella Karen Kristjánsdóttur, Víkingi vann í 1. flokki kvenna. Daníel Hannesson, KR vann 2. flokk karla og Guðbjörg Vala Gunnarsdóttir, KR í 2. flokki kvenna.
Víkingur vann því sjö titla á mótinu og KR tvo.
Verðlaunahafar
Meistaraflokkur karla
1. Magnús Jóhann Hjartarson, Víkingi
2. Ingi Darvis Rodriguez, Víkingi
3.-4. Davíð Jónsson, KR
3.-4. Magnús Gauti Úlfarsson, BH
Undanúrslitaleikirnir voru jafnir og spennandi. Nafnarnir Magnús Jóhann og Magnús Gauti mættust í öðrum leiknum en Magnús Gauti átti titil að verja. Magnús Jóhann hafði sigur 4-2 og komst í úrslit í þessum flokki í fyrsta skipti. Í hinum leiknum vann Ingi Darvis Davíð 11-8 í oddalotu eftir að hafa verið 1-3 undir. Leikurinn á milli þeirra félaganna Magnúsar Jóhanns og Inga Darvis var jafn og spennandi og endaði með 11-9 sigri Magnúsar í oddalotu (11-7, 11-5, 9-11, 11-13, 11-9, 6-11, 11-9). Magnús tryggði sér þar með fyrsta titil sinn í meistaraflokki og fagnaði vel.
Meistaraflokkur kvenna
1. Nevena Tasic, Víkingi
2. Sól Kristínardóttir Mixa, BH
3.-4. Ársól Clara Arnardóttir, KR
3.-4. Kristín Ingibjörg Magnúsdóttir, KR
Nevena og Sól mættust í úrslitum annað árið í röð og annað árið í röð sigraði Nevena. Hún fór í gegnum mótið án þess að tapa lotu. Hún vann Ársól 4-0 í undanúrslitum en Sól lagði Kristínu 4-1 í hinum undanúrslitaleiknum. Úrslitaleikinn vann Nevena 11-4, 11-6, 11-3, 11-6.
1. flokkur karla
1. Daníel Bergmann Ásmundsson, Víkingi
2. Eiríkur Logi Gunnarsson, KR
3.-4. Björgvin Ingi Ólafsson, HK
3.-4. Elvar Pierre Kjartansson, KR
Daníel hefur nýlega byrjað að keppa aftur eftir nokkurra ára hlé og þetta er fyrsti titillinn hans í einliðaleik á Íslandsmóti. Hann lenti 0-2 undir í úrslitaleiknum gegn Eiríki, en tókst að snúa leiknum við og vinna í oddalotu, 8-11, 7-11, 11-8, 11-6, 11-5.
1. flokkur kvenna
1. Stella Karen Kristjánsdóttir, Víkingi
2. Kristín Ingibjörg Magnúsdóttir, KR
3.-4. Ársól Clara Arnardóttir, KR
3.-4. Þóra Þórisdóttir, KR
Stella vann Kristínu örugglega 3-0 í úrslitum (11-7, 11-8, 11-7) en þurfti að hafa meira fyrir sigrinum gegnum Þóru í undanúrslitum og Láru Ívarsdóttur í 8 manna úrslitum en hún vann þær báðar í oddalotu. Stella vann líka 1. flokkinn árið 2018.
2. flokkur karla
1. Daníel Hannesson, KR
2. Michael May-Majewski, BR
3.-4. Reynir Georgsson, HK
3.-4. Victor Berzoi, HK
Daníel var raðað nr. 14 í flokknum, og hann lagði Michael, sem var raðað nr. 15 örugglega í úrslitaleik, 11-4, 11-4, 11-8. Daníel hefur nýlega tekið upp spaðann aftur eftir margra ára fjarveru, en hann var Íslandsmeistari í sínum aldursflokki 2005 og 2006.
2. flokkur kvenna
1. Guðbjörg Vala Gunnarsdóttir, KR
2. Kristjana Áslaug Káradóttir Thors, KR
3.-4. Jóna Elísabet Sturludóttir, KR
3.-4. Sara Elísabet Jónsdóttir, BH
Hin 11 ára Guðbjörg Vala var öruggur sigurvegari í flokknum og tapaði ekki lotu. Hún vann Kristjönu 11-4, 13-11, 11-4 í úrslitunum.
Tvíliðaleikur karla
1. Ingi Darvis Rodriguez/Magnús Jóhann Hjartarson, Víkingi
2. Birgir Ívarsson/Magnús Gauti Úlfarsson, BH
3.-4. Ellert Kristján Georgsson/Gestur Gunnarsson, KR
3.-4. Guðjón Páll Tómasson/Pétur Marteinn Urbancic Tómasson KR/BH
Þeir Ingi Darvis og Magnús Jóhann sigruðu Íslandsmeistara síðustu þriggja ára, Birgi og Magnús Gauta 3-1 (12-10, 10-12, 11-8, 11-7) í úrslitaleiknum og tryggðu sér titilinn í fyrsta skipti.
Tvíliðaleikur kvenna
1. Nevena Tasic/Stella Karen Kristjánsdóttir, Víkingi
2. Lára Ívarsdóttir/Þóra Þórisdóttir, KR
3.-4. Aldís Rún Lárusdóttir/Guðrún G Björnsdóttir, KR
3.-4. Ársól Clara Arnardóttir/Kristín Ingibjörg Magnúsdóttir, KR
Nevena varði titilinn sem hún vann með Agnesi Brynjarsdóttur í fyrra, en Stella varð Íslandsmeistari í tvíliðaleik í fyrsta skipti. Þær sigruðu örugglega 3-0 (11-8, 11-6, 11-3) í úrslitaleiknum og fóru í gegnum mótið án þess að tapa lotu.
Tvenndarleikur
1. Ingi Darvis Rodriguez/Nevena Tasic, Víkingi
2. Magnús Gauti Úlfarsson/Sól Kristínardóttir Mixa, BH
3.-4. Davíð Jónsson/Aldís Rún Lárusdóttir, KR
3.-4. Magnús Jóhann Hjartarson/Stella Karen Kristjánsdóttir, Víkingi
Þau Nevena og Ingi Darvis vörðu titilinn, sem þau unnu í fyrsta skipti í fyrra. Þau lentu 0-2 undir í úrslitaleiknum en sigruðu á endanum í oddalotu, 7-11, 6-11, 11-6, 11-7, 11-2.
Myndir frá Ingimar Ingimarssyni, nema forsíðumyndin.
