Næst síðasta leikjahelgi Raflandsdeildar að baki
Fjórða og næst síðasta leikjahelgin í deildakeppni BTÍ fór
fram í íþróttahúsi Hagaskóla um helgina. Tvær umferðir voru spilaðar í
Raflandsdeildinni og einnig var spilað í 2. deild.
Í efstu deild kvenna unnu Víkingsstúlkur báðar viðureignir
sínar og sitja því í efsta sæti deildarinnar með fjögurra stiga forystu á næstu
lið. Þær sigruðu BH í fyrri umferð helgarinnar 3-0 og í síðari umferðinni
sigruðu þær KR-A 3-2. Viðureignin var æsispennandi þar sem m.a. þurfti að
framlengja oddalotu í tvíliðaleiknum en þær Agnes Brynjarsdóttir og Lóa
Floriansdóttir Zink, Víkingi töpuðu naumlega 10-12 fyrir Ársól Arnardóttur og
Kristínu Ingibjörgu Magnúsdóttur, KR í fimmtu lotu. Lokaleikur viðureignarinnar
var því í raun úrslitaleikur og þar mættust Agnes og Þóra Þórisdóttir og fór sá
leikur 3-1 fyrir Agnesi og sigur Víkinga þar með í höfn.
Í efstu deild karla var sömuleiðis mikil spenna enda þrjú
lið jöfn að stigum í fyrsta til þriðja sæti deildarinnar þegar aðeins tvær
umferðir eru eftir en það eru BH-A, KR-A og Víkingur-A. Bæði BH-A og Víkingur-A
unnu báðar viðureignir sínar um helgina en rétt eins og kvennamegin þá var
spennan mest í viðureign Víkings-A og KR-A.
Eftir fyrstu einliðaleikina voru Víkingar komnir í 2-0 en KR-ingar náðu
að jafna í 2-2 með því að vinna tvíliðaleikinn og næsta einliðaleik. Það þurfti
því fimmta leik í viðureigninni til að fá fram úrslit og þar mættust Magnús
Jóhann Hjartarson, Víkingi og Davíð Jónsson, KR. Þeir skiptust á að vinna
loturnar en í fimmtu og síðustu lotunni náði Magnús að knýja fram sigur og þar
með unnu Víkingar viðureignina 3-2.
Í annarri deild voru óvæntustu úrslitin þau að ÍFR vann 3-2 sigur á Víkingi C en eftir umferðir helgarinnar er staðan í deildinni sú að KR-D og Víkingur-C eru efst og jöfn með tveggja stiga forskot á HK-B sem er í þriðja sæti.
Tvær síðustu umferðir deildarkeppninnar fara fram helgina 22.-23. febrúar og þá ræðst hverjir verða deildarmeistarar fyrir tímabilið 2019-2020. Fjögur efstu liðin í deildinni munu svo í framhaldi spila til úrslita um Íslandsmeistaratitillinn í liðakeppni.
