Ólafur Elí sæmdur gullmerki ÍSÍ

Ólafur Elí Magnússon, íþróttafrömuður úr Dímon, hefur verið sæmdur gullmerki ÍSÍ fyrir sjálfboðaliðastarf sitt í þágu íþrótta. Gullmerkið var afhent þegar tilkynnt var um kjör íþróttamanns ársins og kjör íþróttaeldhuga ársins, en Ólafur Elí var einn þeirra sem var tilnefndur sem íþróttaeldhugi.

Þetta segir á vef ÍSÍ um ástæðu fyrir veitingu viðurkenningarinnar:
„Ólafur Elí Magnússon hefur starfað fyrir Íþróttafélagið Dímon. Hann hefur um langt skeið unnið ómetanlega að íþróttastarfi barna og ungmenna í Rangárþingi eystra og verið óþreytandi í að gefa tíma sinn til þeirra málefna hvort sem er í gegnum íþróttafélagið Dímon eða á öðrum vettvangi. Hann hefur í um 30 ár staðið fyrir æfingum í mörgum íþróttagreinum og hvatt börn og unglinga í félaginu til að taka þátt í mótum. Ólafur hefur fylgt keppendum á mót og ekki talið það eftir sér að keyra þá um allt land. Ólafur hefur prívat og persónulega staðið fyrir íþróttaskóla fyrir tvo elstu árganga leikskólans í yfir 25 ár og þannig stuðlað að áframhaldandi íþróttaiðkun þeirra, endurgjaldslaust. Ólafur hefur setið í aðalstjórn Íþróttafélagsins Dímonar um margra ára skeið auk þess sem hann á sæti í stjórnum borðtennis-, frjálsíþrótta- og glímudeilda félagsins. “

Forsíðumynd af vef sunnlenska.is.