Reglugerð um flokkakeppni uppfærð lítillega
Þann 19. september 2025 var tveimur málsgreinum bætt við í reglugerð BTÍ um flokkakeppni, þ.e. 4. mgr. 8. gr. og 2. mgr. 12. gr. sem formönnum höfðu áður verið kynntar í tölvupóstum um fyrirkomulag deildarkeppni:
- Til viðbótar því er heimilt að fá lánsleikmann lánaðan úr liði sama félags úr neðri deild í efri deild (aðeins eitt skipti hvern leikmann yfir tímabilið). Ekki er hægt að kalla á lánsleikmann í lið í neðstu deildum karla og kvenna. Tilkynning um tímabundið lán skal senda á mótanefnd að minnsta kosti sólarhring fyrir deildarkeppni. Heimilt er leikmanni sem fer á tímabundið lán með þessum hætti að leika jafnframt fyrir sitt hefðbundna lið í neðri deildinni sama keppnisdag eða sömu keppnishelgi, svo lengi sem viðureignirnar eru ekki á dagskrá á sama tíma.
- Til þess að leikmaður sé gjaldgengur í úrslitakeppni deildar skal hann hafa keppt í og lokið einum einliðaleik eða tvíliðaleik hið minnsta í viðkomandi deildakeppni tímabilsins.
Samtímis var úrelt útgáfa keppnisfyrirkomulags uppfærð, þ.e. bætt inn umfjöllun um „tíu leikja kerfi“, sbr. frétt á bordtennis.is frá 13.09.2022 og upphaf 5. mgr. 12. gr. lagfærð: „Úrslitakeppni skal aðeins leikin í neðri deild hafi deildin verið leikin í tveimur eða fleiri riðlum.“
