Íslensku keppendurnir héldu áfram keppni á Klubbresornas Klubbresa 2022 í Gautaborg laugardaginn 5. júní. Sól Kristínardóttir Mixa vann sigur í öðrum flokki sínum á mótinu, í þetta skipti í flokknum Max 899.

Allir keppendurnir hafa unnið leiki í mótinu og hafa staðið sig vel, skv. pistli frá Kára Mímissyni á fésbókarsíðu BTÍ.

Helstu úrslit íslensku keppendanna laugardaginn 5. júní:

Sól Kristínardóttir Mixa sigraði í flokki Max 899 eftir að hafa orðið í 2. sæti í sínum riðli. Hún vann líka sinn riðil í Max 1199 flokknum en féll úr leik í 16 manna úrslitum.

Gestur Gunnarsson vann sinn riðil í Max 1899 flokknum og endaði í 3.-4. sæti.

Óskar Agnarsson varð í 2. sæti í sínum riðli í Max 1899 flokknum. Hann hafnaði í 5.-8. sæti eftir tap gegn sigurvegaranum í flokknum. Óskar fékk svo sæti í sterkasta flokki mótsins, Max 2699. Óskar stóð sig vel þótt hann ynni ekki leik. Tapaði tveimur leikjum í oddalotu og einum leik 1-3.

Stella Karen Kristjánsdóttir vann sinn riðil í flokki Max 899. Hún féll svo úr leik í 16 manna úrslitum.

Aldís Rún Lárusdóttir varð í 2. sæti í sínum riðil í flokki Max 899. Hún féll úr leik í 16 manna úrslitum.

Björn Gunnarsson varð í 3. sæti í sínum riðli í Max 1899 flokknum og komst ekki upp úr riðlinum.

Síðasti keppnisdagurinn á mótinu er mánudaginn 6. júní.