Styrkleikalisti 1. maí hefur verið birtur
Styrkleikalisti fyrir 1. maí 2019 (kallaður eftir viku 19) hefur verið birtur á vefnum, með fyrirvara um réttar skráningar.
Frá því að síðasti listi var birtur hafa úrslitakeppnin í Raflandsdeildinni og 2. deild, styrkleikamót Dímonar á sumardaginn fyrsta (25. apríl), Íslandsmót öldunga 27. apríl, lokamót Grand Prix mótaraðarinnar 27. apríl og aldursflokkamót KR 28. apríl verið lesinn inn í styrkleikalistann.
Við uppfærslu á þessum lista gerðist það helst markvert að Guðbjörg Vala Gunnarsdóttir, KR og Hildur Halla Þorvaldsdóttir KR, fóru upp í 1. flokk í fyrsta skipti. Guðbjörg Vala er 8 ára og að líklega yngsta stúlkan til að fara upp í 1. flokk kvenna. Guðbjörg hefur aðallega keppt á aldursflokkamótum en vægi þeirra móta á styrkleikalistanum var aukið í fyrra, sem hjálpaði Guðbjörgu að ná þessum árangri.
Í apríl var gert átak í að halda áfram að hreinsa leikmenn út af styrkleikalista karla, sem ekki hafa leikið síðan árið 2014. Þess vegna hækka svo til allir karlar um sæti á listanum, enda þótt stigafjöldi þeirra sé óbreyttur. Mest hækka þeir sem eru neðst á listanum. Enn á þó eftir að hreinsa um helming karlalistans af óvirkum leikmönnum en á kvennalistanum eiga eingöngu að vera leikmenn sem hafa leikið árið 2015 eða síðar.
Til að skoða styrkleikalistann er valinn flipinn Styrkleikalisti efst á þessari síðu, og er þá hægt að skoða listann og fletta upp einstökum leikmönnum og þeim leikjum sem telja á listanum. Talan fjöldi móta, fyrir aftan hvern leikmann, telur ekki með leiki í deildarkeppninni.
Ef eitthvað er vitlaust skráð, vinsamlegast hafið samband við Ástu ([email protected]) eða Hlöðver ([email protected]).
Forsíðumynd af Guðbjörgu frá aldursflokkamóti BH fyrr á þessu ári.
ÁMU
