Styrkleikalisti fyrir 1. mars birtur
Styrkleikalisti fyrir 1. mars 2020 (kallaður eftir viku 10) hefur verið birtur á vefnum, með fyrirvara um réttar skráningar.
Frá því að síðasti listi var birtur hafa Grand Prix mót Víkings 8. febrúar, aldursflokkamót Víkings 9. febrúar, Íslandsmótið 28. febrúar – 1. mars og leikir í deildakeppninni 22. febrúar verið lesin inn í styrkleikalistann.
Það sem gerðist m.a. markvert við þessa uppfærslu er að Gestur Gunnarsson úr KR fór upp í meistaraflokk í fyrsta skipti. Elvar Kjartansson, KR er kominn í 1. flokk karla og Þuríður Þöll Bjarnadóttir, KR og Berglind Anna Magnúsdóttir, KR í 1. flokk kvenna.
Búið er að hreinsa út af listanum alla þá sem ekki hafa keppt síðan árið 2015, svo á þeim lista sem birtist núna sjást aðeins leikmenn sem hafa leikið árin 2016-2020. Þess vegna hækka margir leikmenn um sæti á listanum. Önnur ástæða fyrir því að margir færast til um sæti á listanum, er sú að um 50 nýir leikmenn bættust við á styrkleikalistann í febrúar og fóru þeir flestir inn á listann með 1200 stig.
Nokkrir leikmenn, sem ekki höfðu keppt síðan 2015 komu aftur inn á listann með sín gömlu styrkleikastig.
Til að skoða styrkleikalistann er valinn flipinn Styrkleikalisti efst á þessari síðu, og er þá hægt að skoða listann og fletta upp einstökum leikmönnum og þeim leikjum sem telja á listanum. Talan fjöldi móta, fyrir aftan hvern leikmann, telur ekki með leiki í deildarkeppninni.
Ef eitthvað er vitlaust skráð, vinsamlegast hafið samband við Ástu ([email protected]) eða Hlöðver ([email protected]).
Forsíðumynd af Gesti úr myndasafni BTÍ.
