Þorbergur vann leik á fyrsta degi einstaklingskeppni á EM unglinga
Keppni hófst í einstaklingsgreinum á EM unglinga í Póllandi þann 19. júlí. Íslensku keppendurnir kepptu í riðlum í einliðaleik og lauk riðlakeppninni í dag. Ýmist voru þrír eða fjórir leikmenn í hverjum riðli. Auk þess keppti Sól Kristínardóttir Mixa í tvenndarleik.
Þorbergur Freyr Pálmarsson vann eina leikinn sem Íslendingar unnu í dag en hann sigraði leikmann frá Norður-Makedóníu 3-0 í riðli 34 í einliðaleik drengja. Þorbergur tapaði svo 0-3 fyrir leikmönnum frá Búlgaríu og Úkraínu og varð í 3. sæti riðilsins.
Alexander Ivanov var nálægt því að vinna leik gegn Neil Invorvaja frá Möltu í riðli 15 í einliðaleik sveina, en hann tapaði 10-12 í oddalotu. Maltverjanum tókst þar með að hefna fyrir tap sitt í liðakeppninni, þar sem Alexander lagði hann 13-11 í oddalotu. Auk þess tapaði Alexander 0-3 fyrir leikmönnum frá Belgíu og Spáni.
Aðrir leikmenn Íslands töpuðu sínum leikjum 0-3.
Sól Kristínardóttir Mixa lék með Maksims Stasevskis frá Lettlandi í tvenndarleik 16-18 ára en í tvenndarleik er leikið með útsláttarfyrirkomulagi. Þau töpuðu fyrir pari frá Wales. Hún tapaði í einliðaleik fyrir stúlkum frá Belgíu, Noregi og Serbíu í riðli 17.
Eiríkur Logi Gunnarsson lék í riðli 36 í einliðaleik drengja. Hann tapaði fyrir leikmönnum frá Ítalíu, Lettlandi og Noregi.
Steinar Andrason lék líka í einliðaleik drengja og tapaði fyrir leikmönnum frá Lúxemborg og Spáni í riðli 28.
Benedikt Aron Jóhannsson var í riðli 8 í einliðaleik sveina og tapaði hann fyrir leikmönnum frá Búlgaríu, Króatíu og Serbíu.
Tómas Hinrik Holloway var í riðli 24 og tapaði fyrir leikmönnum frá Ísrael, Skotlandi og Svíþjóð í einliðaleik sveina.
Þann 20. júlí leika Alexander og Benedikt í tvíliðaleik sveina kl. 9.30 og mæta þeir leikmönnum frá Búlgaríu. Kl. 11 eiga svo Eiríkur Logi og Þorbergur leik í tvíliðaleik drengja við par frá Kosovo.
