Tvöfaldur íslenskur sigur í tvíliðaleik karla á Arctic mótinu

Jóhannes Bjarki Urbancic Tómasson og Kári Mímisson sigruðu í tvíliðaleik karla á Arctic mótinu í Færeyjum. Ísland sigraði tvöfalt í tvíliðaleik því Ingi Darvis Rodriquez og Magnús Gauti Úlfarsson urðu í 2. sæti. Jóhannes og Kári sigruðu grænlensku bræðurna Aqqalu og Ivik Nielsen í framlengdri oddalotu í undanúrslitum. Ingi og Magnús lögðu grænlenskt par í hinum undanúrslitunum.

Magnús Gauti Úlfarsson varð í 2. sæti í einliðaleik karla, en hann tapaði 0-4 fyrir Ivik Nielsen frá Grænlandi í úrslitum. Kári Mímisson hafnaði í 3.-4. sæti en hann tapaði fyrir Ivik í undanúrslitum. Magnús Gauti sigraði Eyðun Ellendersen frá Færeyjum, 4-0 í hinum undanúrslitaleiknum.

Jóhannes Bjarki Urbancic Tómasson og Aldís Rún Lárusdóttir enduðu í 5.-8. sæti í tvenndarleik en þau töpuðu fyrir Henriettu Nielsen og Pætur Albinus frá Færeyjum í 8 manna úrslitum.

Á forsíðumyndinni, sem kemur af Facebook síðu BTÍ, má sjá Kára og Magnús Gauta, sem urðu í verðlaunasæti í einliðaleik karla.

ÁMU