Úrslitaleikir í liðakeppni dagur 2

Í úrslitum í liðakeppni karla keppti Svartfjallaland gegn Mónakó. Svartfjallaland átti hörkuleik við Lúxemborg í undanúrslitum á meðan Mónakó fékk auðveldari leik við San Marínó.

Það var augljóst að Irfan Ceric frá Svartfjallalandi ætlaði sér að vinna fyrsta leikinn og sigraði hann Anthony Peretti frá Mónakó 3-0. Luka Bakic átti næsta leik við Damien Provost og byrjaði Bakic betur og vann fyrstu tvær loturnar. En baráttan hjá Provost skilaði honum aft inn í leikinn og eftir hörkuspennandi lotur vann Provost leikinn 2-3. Í tvíliðaleiknum nýttu Mónakómenn sér það að hafa unnið leikinn á undan en Svartfellingar gáfu ekkert eftir. Leikurinn var spennandi og hefði getað endað á hvern veginn sem er en Mónakó endaði á að vinna leikinn, 3-1 fyrir Mónakó. Cerkic átti harma að hefna en Provost var í banastuð og átti góðan leik og tryggði Mónakó leikinn 3-1. Mónakó vann þar með liðakeppni karla.

Í úrslitaleik liðakeppni kvenna keppti Mónakó gegn Lúxemborg.

Það var spennandi að sjá Lúxemborg keppa við Mónakó þar sem bæði lið hafa keppenda á top 100 í heiminum og topp 20 í Evrópu. Lúxemborg ákvað að byrja á sínum sterkasta leikmanni í fysta leik, Xia Lian Ni, en hún er númer 68 í heiminum, og keppti við Ulrika Quist, leikurinn fór 3-0 fyrir Ni. Þá var komið að Mónakó að tefla fram sínum sterkasta leikmanni, Xiaoxin Yang en hún er númer 44 í heiminum, hún keppti við Sarah De Nutte, leikurinn endaði 3-1 fyrir Yang. Í tvíliðaleiknum voru Lúxemborg stelpurnar sterkari aðilinn og þær unnu örugglega 3-0. Þá var komið að leiknum sem margir höfðu beðið eftir, Ni á móti Yang. Yang átti rosalega góðan leik og sigraði Ni örugglega 3-0. Oddaleikurinn var æsispennandi eins og við mátti búast þegar titill er í húfi. En De Nutte kom, sá og sigraði Quist örugglega 3-0 og Lúxemborg varð sigurvegari í liðakeppni kvenna og varði titilinn frá því á síðustu Smáþjóðleikum.