Tillögur um breytingar á keppnisreglum BTÍ
Eftirfarandi breytingatillögur hafa borist stjórn Borðtennissambands Íslands á keppnisreglum BTÍ. Þær verða teknar fyrir á ársþingi BTÍ 13. maí nk.
1. Breytingartillaga – Keppnisreglur BTÍ
5. grein
Leikmaður getur skipt um félag einu sinni á leikári. Félagaskiptin tilkynnist mótanefnd BTÍ á þar til gerðu eyðublaði sem beri með sér að leikmaður sé skuldlaus við fyrra félag. Félagaskiptin taka gildi þann dag sem formaður mótanefndar undirritar eyðublaðið. Leikmaður sem leikið hefur í flokkakeppni getur þó ekki leikið með sínu nýja félagi fyrr en að 30 dögum liðnum.
Verður:
5. grein
Leikmaður getur skipt um félag einu sinni á leikári. Félagaskiptin tilkynnist mótanefnd BTÍ á þar til gerðu eyðublaði sem beri með sér að leikmaður sé skuldlaus við fyrra félag. Félagaskiptin taka gildi þann dag sem formaður mótanefndar undirritar eyðublaðið.
Röksemdafærsla:
Það er óþarfi að setja takmörk á hvaða leikmenn, sem skipta um félag, geta leikið í efstu deild. Ef leikmenn eru að skipta er það líklegast til þess að geta spilað meira og mér finnst 30 dagar vera ansi þungt. Það gæti þá lent þannig að leikmaður sem skiptir í byrjun janúar missi af jafnvel tveimur deildarhelgum, eða 4 leikjum og þar með 40% af öllu tímabilinu. Markmið okkar hlýtur að vera að leikmenn spili meira í deildakeppni, ekki minna. Legg til að taka algjörlega út þessa takmörkun á spilatíma og leyfa leikmönnum að spila frjálst eftir að hafa skipt um félag.
2. Breytingartillaga – Keppnisreglur BTÍ
14.grein, 2.mgr.
Í tvíliðaleik eða tvenndarkeppni skal fyrst raða sigurvegurum sömu keppni frá fyrra ári, síðan þeim sem urðu í öðru sæti í sömu keppni og síðast öðrum pörum eftir samanlögðum punktafjölda.
Verður:
14.grein, 2.mgr.
Í tvíliðaleik eða tvenndarkeppni skal fyrst raða sigurvegurum sömu keppni frá fyrra ári og síðan öðrum pörum eftir samanlögðum punktafjölda.
Röksemdarfærsla:
Mjög spes að hafa sérstakar reglur í tvíliðaleik um að raða 2. sæti aftur á næsta ári. Þetta er venjulega bara gert á Íslandsmótum (þó að önnur tvíliðaleiksmót ættu að fara eftir þessu líka) og fer þetta einnig í bága við 4.gr í reglugerð um Íslandsmót þar sem segir: „Íslandsmeistara frá fyrra ári skal raða fyrst. Síðan skal farið eftir styrkleikalista.“
Finnst þetta einnig ósanngjarnt þar sem að pör eru ekki alltaf þau sömu ár eftir á og því væri sanngjarnara að raða öllum, fyrir utan sigurvegurum, eftir styrkleikalistanum eins og er gert í einliðaleik.
3. Breytingartillaga – Keppnisreglur BTÍ
17.grein
Þegar dregið er skal leikmönnum frá félagi sem sendir tvo leikmenn eða pör og fleiri skipt jafnt milli helminga fjórðunga og áttunduparta.
Verður:
17.grein
Þegar dregið er skal leikmönnum frá félagi sem sendir tvo leikmenn eða pör og fleiri skipt jafnt milli helminga fjórðunga og áttunduparta. Þetta gildir þó ekki á Íslandsmótum.
Röksemdarfærsla:
Markmið þessarar reglu er væntanlega sú að leikmenn sem æfa saman og keppa því reglulega hver við aðra geti ekki lent saman í fyrsta leik. Ég er mjög fylgjandi þessarar reglu á öllum mótum almennt, en alls ekki á Íslandsmótum. Markmiðið á Íslandsmótunum er að krýna sigurvegara, þ.e.a.s. keppast um hver sé bestur á Íslandi í hverjum flokki fyrir sig. Mér finnst ekki rétt að það geti skipt máli hvar þú lendir í töflunni, út frá því í hvaða félag þú ert skráður. Það ætti að vera jafnt fyrir alla leikmenn, óháð hvaða félag þau spila fyrir, hvar þau lenda í drættinum á þessu mikilvæga móti. Það er nóg að notast við styrkleikalistann og raða leikmönnum með röðun eftir því svo þeir lendi ekki saman.
Svo má benda á það að samkvæmt 1.gr keppnisreglna BTÍ stendur:
„Í allri keppni og mótum sem haldin eru á vegum BTÍ eða félaga í BTÍ skal farið eftir gildandi leikreglum BTÍ/ITTF og leikreglum ITTF.“
Í leikreglum ITTF er leikmönnum frá sama landi ekki skipt jafnt milli helminga fjórðunga og áttundaparta, heldur er einungis notast við styrkleikalista. Það kemur oft fyrir að leikmenn frá sama landi geta lent á móti hvor öðrum í fyrsta leik á stærstu mótunum, eins og t.d. HM og EM. Samkvæmt 1.gr keppnisreglna ættum við því að halda okkur í samræmi við ITTF og breyta þessu á okkar Íslandsmótum.
Kær kveðja,
Jóhannes Bjarki Urbancic Tómasson
Pétur Marteinn Urbancic Tómasson
Tómas Ingi Shelton
