Breytingartillögur á ársþingi BTÍ
Eins og áður greinir verður ársþing BTÍ í C-sal íþróttamiðstöðvarinnar í Laugardalnum kl. 15 laugardaginn 4. maí nk. Sjá dagskrá ásamt upplýsingum um fjölda þingfulltrúa. Kjörbréf er aðgengilegt í viðhengi og er mælt með því að fulltrúar félaga komi með slík með sér en annars verða óútfyllt kjörbréf einnig aðgengileg á staðnum.
Í dagskránni hafði þegar komið fram af hálfu stjórnar að „Til viðbótar við hefðbundna dagskrá verður rætt um fyrirkomulag Íslandsmóts fullorðinna, þá einkum hvort taka eigi upp riðlafyrirkomulag og hvort 2. og 1. flokkur eigi að vera áfram, í samhengi við hvernig mótið er í nágrannalöndum okkar.“
Auk þess bárust stjórn breytingartillögur frá fjórum borðtennisleikmönnum, sem ræddar verða á þinginu og má lesa hér að neðan:
Ásta Melitta Urbancic:
Tillaga til breytingar að reglugerð um Íslandsmót, sjá viðhengi.
Magnús Gauti Úlfarsson:
„1. Ég legg til breytingu á vægi móta á styrkleikalista BTÍ. Vægi móta sem gilda inn á lokamótaröð BTÍ ætti að færast frá vægi 2 upp í vægi 3. Sama ætti að gilda um lokamótið sjálft.
Ástæðan er sú að mikilvægi þessara móta er meira en punktamóta sem einnig flokkast undir vægi 2. Fjöldi punktamóta er ótakmarkaður á hverju tímabili, en mót sem gilda inn á lokamótaröðina eru hámark 4 talsins. Að auki má nefna að þátttaka á þeim mótum getur tryggt manni sæti á lokað mót með rausnarlegt verðlaunafé fyrir verðlaunahafa. Enn fremur má nefna að á punktamótum er ávallt spilað upp í 3 lotur, en á mótum sem gilda inn á lokamótaröð BTÍ er stundum spilað upp í 4.
2. Það ætti að staðla fjölda lotna sem spilað er upp í á mótum sem gilda inn á lokamótaröð BTÍ. Á einu mótinu var spilað upp í 4, en á hinum þremur var spilað upp í þrjá. Erfitt er að réttlæta að hafa sama vægi á mótum sem spilað er upp í 3 lotur samanborið við 4 lotur. Einnig myndi þessi breyting fyrirbyggja misskilning og rugling. (Ég legg til að spilað verður upp í 4).
[Ath. Þorbergur Freyr gerði tillögur samskonar þessum tveimur fyrstu frá Magnúsi og leyfir tillögum Magnúsar að duga]
3. Lækka ætti vægi deildarkeppnarinnar á styrkleikalistanum frá 3 niður í 2. Með nýju keppnisfyrirkomulagi er fjöldi leikja tvöfaldaður án þess þó að breyta væginu til að vega á móti þeirri breytingu.
4. Að bæta við fleiri flokkum á styrkleikalistanum. Til dæmis þegar leikmaður nær 2000 stigum og/eða 2250 stigum kemst leikmaður upp í stórmeistaraflokk eða eitthvað álíka. Þetta er einföld breyting í framkvæmd, en hún gefur leikmönnum ríkari ástæðu til að mæta á mót og spila. Margir hætta að spila þegar þeir eru komnir upp í meistaraflokk því þeir eru komnir á hæsta þrepið. Einnig hætta margir að spila til að “vernda stigin sín”, í stað þess að halda áfram að reyna að komast hærra. Þessir flokkar þyrftu ekki að breyta neinu m.t.t. móthalds, þ.e. meistaraflokkur væri enn hæsta þrepið.“
Pétur Marteinn Urbancic Tómasson:
Tvær tillögur að breytingum á reglugerð um styrkleikalista BTÍ, sjá viðhengi.
Ath. Þorbergur Freyr gerði samskonar tillögu þeirri fyrri sem Pétur Marteinn gerði og leyfir tillögu Péturs að duga.
Þorbergur Freyr Pálmarsson:
„1. Hafa peningaverðlaun a meistaraflokksmótum, sérstaklega ef þau gilda fyrir lokamóti. Hækka þá bara mótsgjöld. Það gefur sterkari leikmönnum ástæðu til að mæta a mót og verðlaunar leikmenn fyrir góðan árangur.
2. […] Það ætti líka að stytta tímann sem það er fjarlægt leikmenn frá styrkleikalistanum frá 3 árum í 2 ár eða jafnvel 1 ár. Það eru leikmenn sem spila ekki lengur enn í efstu tíu á styrkleikalistanum karla og kvenna megin. Það gefur meiri nákvæmni á hver eru í raun efstir á styrkleikalistanum.“
Ath. skyld sjónarmið komu fram í tölvupósti Péturs Marteins: „Ég væri einnig til í að ræða með almennum hætti, með það fyrir augum að beina frekari breytingum til stjórnar, hvort heppilegasta fyrirkomulagið sé e.t.v. að stig óvirkra leikmanna fyrnist um X% á ári og að þeir gætu fengið röðun í samræmi við þau stig.“
